الثلاثاء، 29 يوليو، 2008

جامد طحن

الحوار التالي هو من محض خيالي
لكنه يتشكل في اطار اراء شخصيه شابه موجوده بالفعل علي أرض مصر
أنا:ايه رأي حضرتك في الحاله العامه اليومين دول؟
هي:البلد الأيام دي في أحسن حالتها...ازدهار و تطور و ديموقراطيه أحسن من ديموقراطيه أمريكا نفسها
بصراحه حاجه تفرح لكن بقه فيه ناس مخربه و متطرفه عاوزين يعملوا بلبله في المجتمع و يخلوا الناس تخرب و تبوظ الانجازات المهوله و البنيه الاساسيه اللي أتعملت و التطور المهول اللي حصل
أنا:طيب حضرتك مش شايفه ان الغلاء و خصوصا في الأسعار في الايام اللي فاتت زياده شويه علي الناس...علي عامه الشعب يعني؟
هي:غلاء؟؟غلاء ايه؟؟حضرتك روحتي أمريكا؟
أنا:لا و الله
هي:انا بقي روحت أمريكا و أوروبا و الدول العربيه و لو قارنتي بين الأسعار حتلاقي ان مصر أرخص دوله في العالم...يعني مثلا مثلا...الفستان السواريه في فرنسا بيتكلف عشرين ألف ,انا بقدر اعمله في مصر بأتناشر ألف بس,غير كده زياده الأستثمار الهايله اللي حصلت حتخاللي كل محلات الأزياء العالميه هاتفتح فروع ليها في مصر و أول ماحتفتح شوفي بقي الرخاء اللي هايعم علي الشعب
أنا:و الله اللي يقعد مع حضرتك و يسمع كلامك يلاقي الدنيا ربيع فعلا...لكن سعر البنزين اللي زاد قوي عامل مشاكل كتيره للشعب لأن كل حاجه غليت بعد غلاء البنزين حتي المواصلات العامه ...مش شايفه ان ده سبب أي مشاكل للناس؟؟
هي:
بالعكس,أنا سعيده جدا بقرار رفع سعر البنزين...لعلمك بقي ده أذكي قرار عملته الحكومه و أنا شخصيا كنت مستنياه بفارغ الصبر
أنا:ازاي يافندم؟ده حضرتك أول واحده تقولي كده
هي:لأني أنا فاهمه كويس الغرض من هذا القرار و فاهمه قصد الحكومه ايه و النتيجه المنتظره اتحققت و ده اللي خلاني اخر سعاده
أنا:النتيجه اللي هي ايه بالظبط؟؟
هي:الزحام ...القضاء علي الزحام,ده قصد الحكومه و اتحقق بعد غلاء البنزين
أنا:مع اني مالاحظتش الحقيقه ان الزحام قل خالص
هي:لأن قوه ملاحظتك مش زي قوه ملاحظتي,هاشرحلك...الشباب الفاضي الصايع اللي ماوراهوش حاجه غير انه ياخد من باباه عشره جنيه يحط بيهم عشره لتر بنزين و يحط أصحابه في العربيه و يقعدوا يلفوا في الشوارع يعاكسوا البنات و يسابقوا بعض و يسوقوا أمريكاني و يعملوا الزحمه الفظيعه بدل مايقعدوا في كافيه محترمه يشربوا حاجه ساقعه و لا سخنه دول خلاص حيقعدوا في بيوتهم
و رب الاسره البخيل النتن اللي مش عاوز يفسح ولاده و لا مراته و يعشيهم في مطعم محترم ..وبيوفر فلوسه و يحطهم
علي قلبه و ياخد عياله و مراته بالعربيه و يقعد يلف بيهم طول الليل في الشوارع و يقرفنا بقه بالزحمه بتاعته هو و
عيلته...دول برضه خلاص كده حيوفروا فلوس البنزين الغالي و يقعدوا في جنينه القلعه و ياكلوا ترمس و يشربوا
حمص الشام علي قدهم....و يفضوا الشوارع بقه خالينا نسوق من غير ازعاج
غير كده كل الناس الغلابه يقعدوا يحوشوا يحوشوا و أول مايبقي معاهم كام ألف يجروا يشتروا عربيات قديمه متنيله
بستين نيله بتكركر و تطلع دخان من الشكمان و كمان بتعطل و تعطل المرور,,و يقعدوا يلفوا و يهيصوا في الشوارع و
النتيجه هي الزحمه و دول برضه خلاص حيركبوا الميكروباص او التوك توك و يوسعوا لما السكه.. لعلمك الناس دي
ملت البلد,و قرفت الحكومه في عيشتها و الحمدلله ان الحكومه أتخذت القرار الصح في الوقت المناسب و الشوارع
فضيت من الاشكال دي عشان كده لما اقولك حكومتنا تجنن تجنن يبقي عندي حق,أنا مش منافقه
أنا:طبعا...أكيد....جاتهم القرف ملوا البلد.....بس فيه ناس تانيه رأيها ان فيه مشاكل كتير في التعليم و المستشفيات و رغيف العيش و الأجور و الضرايب؟
هي:دي ناس حقوده و سوداويه مش شايفين الازدهار المذهل في كل شئ و في كل مجال....شوفي مصر دلوقتي فيها كام بورتو مارينا و كام ملعب جولف و كام مول و كام قريه سياحيه...لا ...لا.....الكلام ده كلام ناس زباله و الحكومه هي السبب
أنا:ازاي؟؟
هي:مدلعاهم اخر دلع و عماله تطبطب علي دول و تحايل دول و تبوس دول ..و ده غلط أوي ...الحكومه اللي ناقصها انها تبقي قاسيه شويه و لا تسمح للناس الحثاله دول انهم يشككوا في حلاوتها
أنا:طب و ظاهره اولاد الشوارع,ايه رأيك فيها؟؟
هي:الظاهره دي سببها ان الناس مش متربيه كويس و النتيجه انهم ماعرفوش يربوا ولادهم كويس و لا دخلوهم مدارس محترمه يتعلموا لغات....سابوهم يلعبوا في الشوارع و يناموا تحت الكباري و يعملوا مناظروحشه غير حضاريه و كمان بيبقوا حراميه و يسرقوا الموبايلات من الناس المحترمه ,و لو انا من الحكومه أرش عليهم جاز و أولع فيهم و تحت الكباري يبقي نضيف و يعملوا فيه اكشاك زهور و ورد,هو ده المنظر الحضاري...لكن للاسف حكومتنا طيبه قوي و قلبها ضعيف
أنا:الحمدلله ان قلبها ضعيف..حضرتك مابتفكريش ترشحي نفسك في الانتخابات و تنضمي للحزب الوطني؟؟
هي:والله نفسي جدا لكن وقتي لا يسمح لكن لو عندي وقت احب انضم للحزب الوطني لأنه يجنن يجنن يجنن
أنا:انا سعيده بالحوار مع شخصيه وطنيه زي حضرتك
هي:ميرسيه كتير
بقلم د.لميس جابر لجريده عين الأسبوعيه

ليست هناك تعليقات: