عشان انت مصري لازم تعاني
وتفقد كرامتك بكل المعاني
وتحرق في دمك سنين مش ثواني
واوعى تصدق كلام الاغاني
بتاع الحضارة وكاني وماني
ده كله هجايص مايدخل وداني
عشان انت مصري العذاب بيناديك
بتبدا في يومك حاجة بترازيك
في نومك في قومك تعكنن عليك
تضايقك ولسه العماص في عينيك
مافيش ميه تشطف صابونة في ايدي
وجسمك ملزق وريحتك عاديك
فتلبس وتنزل وفيك اللي فيك
ورايح لشغلك حتحتاج مواصلة
ادى المترو واقف وكهربته فاصلة
وفي الميكروباص خناقة وحاصلة
اوتوبيس فرامله عايزالها وصلة
وتوك توك ده تايه ومحتاج لبوصلة
بتوصل لشغلك بدم اتحرق
في زحمة وكتمة وحر وعرق
رئيسك سايبلك كومة ورق
ده غير دمغة ضايعة وملف اتسرق
وفي كام مواطن عامللك قلق
بيشكى تقول له روح اندعق
وعركة وهوجة وشاي اندلق
ومخك خلاص من الصداع اتفلق
هترجع لبيتك ده لو كان في بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتي ياناس اتهريت
ولاحد سامعك مهما هاتيت
عشان انت مصري وده للاسف
فلازم تاسي تعيش تتقرف
وكل الاساسي في حياتك ترف
فتنسى الكرامة وتنسى الشرف
وتسرق وتنصب او تنحرف
ودمعك بيجرى وجرحك نزف
مش
انت اللي مصري؟؟؟ جتك القرف
الاشتراك في:
تعليقات الرسالة (Atom)
ليست هناك تعليقات:
إرسال تعليق